ማኅደረ ስብሐት ቅድስት ልደታ ለማርያም እና ደብረ መድኃኒት መድኃኔዓለም ቤተ ክርስቲያን የተመሠረተችው በንግሥት ዘውዲቱ ዘመነ መንግሥት በብፁዕ አቡነ ሳዊሮስ (ጳጳስ ዘደቡብ ኢትዮጵያ) አማካኝነት ሲሆን መቃኞዋ በ1916 ዓ.ም ተተክሎ አሁን ላለችው ቤተ መቅደስ በ1918 ዓ.ም መሠረት ጥለው በ1921 ዓ.ም ለአገልግሎት ክፍት አድርገው እስካሁን ድረስ ከዘጠኝ ዐሠርት ዓመታት በላይ አባቶች ካሕናት እያመሰገኑባት፤ ሊቃውንት አባቶች እየዘመሩባት፤ ምዕመናን እየተገለገሉባት ያለችውን ሕንጻ ቤተክርስቲያን አነጿት። ብፁዕ አቡነ ሳዊሮስ፦ በ1921 ዓ.ም በመጀመሪያ ግብጽ ካይሮ ሄደው ከተሾሙት አራት ጳጳሳት ውስጥ፤ በሕመም ምክንያት ሳይሄዱ ቀርተው የነበሩና፤ በኋላም የእስክንድርያ ፓትርያርክ ብጹዕ ወቅዱስ አቡነ ዮሐንስ በ1922 ዓ.ም ለጉብኝት ወደ ኢትዮጵያ ሲመጡ፤ የዳግማዊ ምኒልክ መታሰቢያ በኾነችው፤ በታሪካዊቷ ታዕካ ነገሥት በአታ ለማርያም ቤተክርስቲያን፤ ጥር 1 ቀን አምስተኛ ኾነው የተሾሙ አባት ሲሆኑ የመጀመሪያ ስማቸው እጨጌ ገብረ መንፈስ ቅዱስ ሲሆን በኋላ ብፁዕ አቡነ ሳዊሮስ ሊቀ ጳጳስ ዘደቡብ ኢትዮጵያ ተብለዋል። እርሳቸውም ፦ እርሱን ብርሃን ስንል እሷን እመ ብርሃን በምንላት እናቱ፤ እሱን አምላክ ስንል እሷን ወላዲተ አምላክ ብለን በምንጠራት ወላዲቱ፤ እሱን ሕይወት ስንል እሷን እመ ሕይወት እያልን ስሟን በውዳሴያችን በምናነሳሳት ሐጻኒቱ፤ በእጆቹ አበጃጅቶ የሰራን አምላካችን፤ ከድቅድቁ ጨለማ ያወጣን ብርሃናችን፤ ለኛ ሲል ሞቶ ሕይወታችን የኾነ ጌታችን፤ በመልዕልተ መስቀል ተሰቅሎ ሳለ የሰጠን እናታችን፤ እኛም በሐዋርያው በቅዱስ ዮሐንስ በኩል ከመስቀሉ ስር ኾነን የተቀበልናት አማላጃችን፤ የባሕርያችን መመኪያ የእግዚአብሔር እናቱ፤ የመዳናችን ምክንያት የአዳም ሕይወቱ በኾነችው በእመቤታችን በቅድስት_ድንግል_ማርያም በልደቷ መታሰቢያ ያነጿት ደብር ናት።