የቃሊቲ መካነ ሰላም ቅድስት አርሴማ እና ቅዱስ ሩፋኤል ቤተ ክርስቲያን በአዲስ አበባ ሀገረ ስብከት በአቃቂ ቃሊቲ ክፍለ ከተማ ቤተ ክህነት ልዩ ስሙ ቃሊቲ ማሰልጠኛ ወይም ውሃ ልማት ኢንዱስትሪ ሠፈር ተብሎ በሚጠራው አካባቢ የምትገኝ ቤተ ክርስቲያን ስትሆን ለብዙ ዓመታት መቃኞ ቤተ ክርስቲያኗን ለመሥራት ጥረት እየተደረገ ከቆየ በኋላ ለመጀመሪያ ጊዜ በ1999 ዓ.ም በወ/ሮ ሙሉ ሮቤ 2165 ካሬ ሜትር ቦታ ለጋሽነት በእነ ቄስ ኑርልኝ ዘለዓለም እና በአካባቢው ምዕመናን እና  እግዚአብሔር በፈቀደላቸው ታላላቅ አባቶች አማካኝነት መቃኞ ቤተ ክርስቲያኑ ተሠርቶ ለ6 ወራት አገልገሎት ከሰጠች በኋላ በወቅቱ ከነበረው የመንግስት የፀጥታ አካላት ጋር ባለመግባባት ምክንያት ብዙ የአካባቢው ምዕመናን ድብደባና እንግለት ከደረሰባቸው በኋላ መቃኞ ቤተ ክርስቲያኑ ፈርሶ የአካባቢው ምዕመናንና በጊዜው የነበረው መሥራች ኮሚቴ በጋራ በመነጋገር በቃሊቲ መካነ ብርሃን ቅዱስ ገብርኤል ቤተ ክርስቲያን በአደራ መልክ ፅላቱን ከንዋዬ ቅዱሳቱ ጋር እንዲቀመጥ አድርገዋል። 

በድጋሜ ቦታውን ለማስከበርና ፅላቱ ወደ መቃኞ ቤተ ክርስቲያኑ እንዲመለስ ተደጋጋሚ ሙከራ ቢደረግም ሳይሳካ ለብዙ ዓመታት ቆይቶ በ2006 ዓ.ም በአዲስ ተጀምሮ አሁንም አገልግሎትን ለመስጠት እንቅስቃሴ ቢደረግም ለሁለተኛ ጊዜ በአፍራሽ ግብረ ኃይል ሊፈርስና አገልግሎቱ ሊቋረጥ ችሏል።

    በመቀጠልም በዚህች ተአምረኛ ቤተ ክርስቲያን መፍረስ በጊዜው ያሳሰባቸው የአካባቢው ምዕመናንና በጊዜው የነበሩ የአዲስ አበባ ሀገረ ስብከት ሊቀ ጳጳስ፣ ሥራ አስኪያጅ፣ የአዲስ አበባ ከተማ ከንቲባ፣የክፍለ ከተማው ቤተ ክህነት ዋና ሥራ አስኪያጅ እና የተለያዩ የሚመለከታቸው የሃይማኖት አባቶችና የመንግሥት አካላት ቤተ ክርስቲያኗ ትተከል የሚል ደብዳቤ ቢፅፉም ሳይሳካ ለ15 ዓመታት ቆይቷል።

   በመሆኑም ይሄንን ጉዳይ በድጋሜ በማጤን እና ቤተ ክርስቲያኗ መተከል አለባት የሚለውን እንደ መርህ በመያዝ እና ክርስቲያናዊ ግዴታችንን መወጣት አለብን በማለት እስከ ከንቲባ ጽ/ቤት ድረስ በመጓዝ ቤተ ክርስቲያኗ ባለመብትና ባለይዞታ እንድትሆን በካቢኔ ውሳኔ እንድታገኝ እግዚአብሔርን አጋዥ በማድረግ ከፍተኛ ጥረት ያደረጉ አባቶችና ወንድሞች እንዲሁም እናቶችም ጨምር የወቅቱ መስራች ኮሚቴ አባላት መልአከ ሰላም ሀዲስ ሐዋርያ ታረቀኝ፣ መልአከ ሰላም ቆሞስ አባ ኪዳነ ማርያም፣መጋቤ ምሥጢር አደለኝ መሰለ፣ላዕከ ወንጌል ስማቸው መልኬ፣መጋቤ ሥርዓት ኑርልኝ ዘለዓለም፣ሊቀ ትጉሃን ቡሩክ ደሳለኝ በመሆን እና የአካባቢ ምዕመናንን በማስተባበር ማለትም ወ/ሮ ሀረገወይን ሽታ፣ወ/ሮ ሰላማዊት ወርቁ፣ወ/ሮ አረጋሽ መኮንን፣ወ/ሮ ማርያምቸር ደለለኝ፣ወጣት አካሉ፣አቶ ስምዖን ጴጥሮስ፣አቶ ሙሉጌታ ተሾመ እና ሌሎችም በስም ያልጠቀስናቸው ብርቅዬ የቤተ ክርስቲያን ፍቅር በልቦናቸው ያደረባቸው ምዕመናን እና በብፅዕ አባታችን አቡነ መልከ ጼዴቅ ቡራኬና ጸሎት እንዲሁም በክፍለ ከተማው ቤተ ክህነት ዋና ሥራ አስኪያጅ በሊቀ ኅሩያን ዳዊት ታደሰ አጋዥነትና አባታዊ መመሪያ ሰጭነት በቤተ ክርስቲያኗ ስም ህጋዊ ካርታ ወጥቶላት ሰኔ 13/2013 ዓ.ም በአካባቢው ምዕመናን ቀናኢ አስተሳሰብ መቃኞ ቤተ ክርስቲያኑ በአጭር ቀናት ውስጥ ተሰርቶ ስደተኛዋ የቅድስት አርሴማ ፅላት ከ15 ዓመታት ቆይታ በኋላ ከመካነ ብርሃን ቅዱስ ገብርኤል ቤተ ክርስቲያን በክብር ወደ ቀድሞ ቦታዋ ተመልሳለች።